21 қараша 2026 ж.
Шұғыл
Басты бет Қоғам

ҚТЖ басшыларының ұсталуына қатысты ресми мәлімдеме жасады

ҚТЖ басшыларының ұсталуына қатысты ресми мәлімдеме жасады
Фото: t.me/samrukkazynaofficial

«Қазақстан темір жолы» ұлттық компаниясы ҚТЖ мен «Самұрық-Қазына» қоры басшыларының ұсталуына байланысты ресми мәлімдеме жасады. Компания құқық қорғау органдарымен бірлесіп жұмыс істеп жатқанын және басшылыққа қатысты жағдайға қарамастан, қалыпты режимде қызметін жалғастыратынын мәлімдеді, деп хабарлайды otirikemes.kz Tizgin.kz сайтына сілтеме жасап.

Ұлттық компанияның мәліметінше, 2026 жылғы 12 қарашада ҚТЖ мен «Самұрық-Қазына» қоры басшыларының сотқа дейінгі тергеу аясында ұсталғаны туралы ақпаратқа қатысты түсініктеме берілген.

Қазіргі уақытта компания құқық қорғау органдарына жан-жақты қолдау көрсетіп, тергеу барысында сұратылған құжаттар мен материалдарды Қазақстан заңнамасына сәйкес ұсынып жатыр.

Сонымен қатар ҚТЖ өкілдері басшылардың ұсталуына қатысты бұған дейін жарияланған ақпараттан басқа қосымша мәлімет жоқ екенін атап өтті. Қылмыстық-процестік кодекстің 201-бабына сәйкес, сотқа дейінгі тергеп-тексеру деректері жария етілмейді. Осыған байланысты компания тергеу барысына қатысты әзірге қосымша түсініктеме бере алмайды.

Компания қалыпты режимде жұмыс істеп жатыр

ҚТЖ басшылығы төңірегіндегі жағдай ұлттық компанияның күнделікті жұмысына әсер етпегенін мәлімдеді.

Компания мен оның құрамындағы еншілес ұйымдар қалыпты жұмыс режимінде қызметін жалғастырып жатыр. Сондай-ақ инвесторлар, кредиторлар, халықаралық қаржы институттары мен іскерлік серіктестер алдындағы барлық міндеттемелердің күшінде қалатыны расталды. Олар қолданыстағы келісімдер талаптарына сәйкес орындалады.

Еске салайық, бұған дейін Ұлттық қауіпсіздік комитеті «Самұрық-Қазына» қоры мен «Қазақстан темір жолы» ұлттық компаниясы басшыларының ұсталғанын растаған болатын.

ҰҚК мәліметінше, 2026 жылғы 11 қарашада ведомствоның Сыбайлас жемқорлыққа қарсы іс-қимыл қызметінің қызметкерлері екі ұлттық компанияның басшыларын ұстаған. Олар сыбайлас жемқорлық қылмысын жасады деген күдікке ілінген.

Қазіргі уақытта қылмыстық іс бойынша барлық мән-жайды анықтауға бағытталған тергеу амалдары жүргізіліп жатыр. Істің өзге мән-жайы әзірге ресми түрде жарияланған жоқ.

Ұқсас жаңалықтар