Алматыда 25 тамыздан бастап электрлік самокаттарды пайдаланудың жаңа талаптары күшіне енеді. Енді тротуарлар мен жаяу жүргіншілер жолында самокат тебуге толықтай тыйым салынады.
Қалалық полиция департаменті Әкімшілік полиция басқармасының бастығы Әбдінұр Тасыбаевтың хабарлауынша, негізгі өзгерістер жаяу жүргіншілер қауіпсіздігін қамтамасыз етуге және көшедегі қозғалысты реттеуге бағытталған.
Жаңа ережелер мен негізгі талаптар
Электрсамокат пайдаланушылары үшін енгізілген басты шектеулер:
Көліктік жолмен тек 18 жасқа толған, кез келген санаттағы жүргізуші куәлігі бар және арнайы қорғаныш шлемін киген азаматтар ғана жүре алады. Қараңғыда жүргенде қолданушыда жарық шағылыстыратын элементтер болуы міндетті.
Электрсамокатпен жолаушы немесе жүк тасымалдауға қатаң тыйым салынады. Жолдан өтер кезде самокат тебуші құралдан түсіп, өткелден жаяу өтуі тиіс.
Шерингтік (прокат) компанияларға қойылатын талаптар
Өзгерістер прокатпен айналысатын кикшерингтік компанияларды да қамтиды:
-
Барлық прокат самокаттарында арнайы тіркеу нөмірі мен міндетті сақтандыру болуы шарт.
-
Сервис провайдерлері самокаттардың техникалық жағдайын, жылдамдық режимін және орналасқан жерін (GPS) ұдайы бақылауда ұстауға міндетті.
Маңызды: Ереже бұзған самокатшылар мен операторлар қолданыстағы заңнамаға сәйкес әкімшілік жауапкершілікке тартылады.
