Үкімет отырысында 2027–2029 жылдарға арналған әлеуметтік-экономикалық даму болжамы мен үш жылдық республикалық бюджет туралы заң жобасы бекітілді. Премьер-министр бюджет қаражатын тиімді жұмсау, ағымдағы шығыстардың ұлғаюына жол бермеу және қатаң қаржылық бақылау орнату басты басымдық екенін атап өтті.
Талқылау қорытындысы бойынша Үкімет мүшелері ұсынылған заң жобасын қолдап, дауыс берді.
Негізгі көрсеткіштер мен міндеттер
Қаржы министрі Мәди Тәкиевтің хабарлауынша, заң жобасы еліміздің әлеуметтік-экономикалық даму болжамы негізінде әзірленген. Тек 2027 жылдың өзінде әлеуметтік саланы қаржыландыруға 10,5 трлн теңге бағыттау жоспарланып отыр.
Мемлекеттік қаражаттың уақытылы әрі мақсатты жұмсалуын қамтамасыз ету, негізсіз шығыстарға жол бермеу міндеті қойылды.
Қаржы және Ұлттық экономика министрліктеріне Үкімет аппаратымен бірлесіп, дайындалған заң жобаларын Құрылтайға қарауға енгізу тапсырылды.
«Бюджет қаражатын барынша тиімді әрі уақытылы пайдалануды қамтамасыз ету, ағымдағы шығыстардың ұлғаюына жол бермеу, сондай-ақ шығыстарға қатаң бақылау орнату өте маңызды». — Премьер-министр
Үкімет бекіткен заң жобасы белгіленген тәртіппен Құрылтай қарауына жолданады.
