10 тамыз - Қазақстанның ерекше мерекелік күндер тізбесіндегі маңызды даталардың бірі. Бұл күні елімізде ұлы ақын, ойшыл әрі ағартушы Абай Құнанбайұлының туған күніне орай Абай күні атап өтіледі. Осы айтулы мерекеге орай Мемлекет басшысы Қасым-Жомарт Тоқаев барша отандастарымызға құттықтау арнады.

Ақорданың ресми сайтында жарияланған құттықтауда Президент ұлы ақынның ұлт тарихы мен мәдениетіндегі айрықша орнына тоқталып, оның қалдырған рухани мұрасының маңыздылығын атап өтті.

«Абай ілімі – рухани шамшырағымыз»

Президент өз сөзінде Абайдың зияткерлік әрі шығармашылық мұрасы ұлттық қана емес, әлемдік мәдениеттің асыл қазынасы екенін айтып, хакімнің «Толық адам» концепциясына арнайы тоқталды.

«Ұлы ойшылдың шығармашылық әрі зияткерлік мұрасы әлемдік және ұлттық мәдениеттің асыл қазынасы қатарынан айрықша орын алады. Абай ілімі – рухани шамшырағымыз, айнымас темірқазығымыз. Ақын жұртшылықты толғандыратын көкейкесті мәселелерді бүкпесіз айтып, халқымызды бейқамдық пен жалқаулықтан аулақ болуға шақырды. Хакімнің «Толық адам» идеясы – әрбір азаматты рухани кемелденуге үндейтін және ешқашан өзектілігін жоғалтпайтын мазмұны терең тұжырым», – деп атап өтті Қасым-Жомарт Тоқаев.

Абай күнінің тарихы мен маңызы

Қазақ жазба әдебиетінің негізін салушы, ақын әрі сазгер Абай Құнанбайұлы 1845 жылы 10 тамызда дүниеге келген. 1995 жылы хәкім Абайдың 150 жылдық мерейтойы халықаралық деңгейде, ЮНЕСКО қамқорлығымен кең көлемде атап өтілді. 2020 жылғы 5 тамыздағы Қазақстан Республикасы Үкіметінің қаулысымен 10 тамыз ресми түрде «Абай күні» болып мерекелік даталар тізбесіне енгізілді.

Абайдың өлеңдері мен қара сөздеріндегі даналық ойлар бүгінгі қоғам үшін де өзінің өзектілігін жоғалтқан жоқ. Тоқаев атап өткендей, ұлы ойшылдың ілімі елдің рухани дамуы мен жастарды отаншылдыққа, білімге ұмтылуға тәрбиелеуде басты темірқазық болып қала береді.