Бүгін Қазақстан Республикасы Орталық сайлау комиссиясының XVI отырысы өтіп, онда жаңадан сайланған ҚР Құрылтайының депутаттары ресми түрде тіркелді. Салтанатты іс-шараға сайланған барлық халық қалаулылары қатысты.
ОСК Төрағасы Нұрлан Әбдіров «Қазақстан Республикасының Құрылтайы және оның депутаттарының мәртебесi туралы» Конституциялық заңның 44-бабына сәйкес, депутаттардың өкілеттігі дәл осы Орталық сайлау комиссиясында тіркелген сәттен басталатынын жеткізді.
Жиында баяндама жасаған ОСК Төрағасының орынбасары Мұхтар Ерманның айтуынша, бес саяси партиядан өткен 145 депутат тіркеуден өтті:
-
«Әділет» партиясы - 110 депутат;
-
«Ауыл» халықтық-демократиялық патриоттық партиясы - 10 депутат;
-
«Respublica» партиясы - 9 депутат;
-
Жалпыұлттық социал-демократиялық партиясы (ЖСДП) - 8 депутат;
-
«Ақ жол» Қазақстанның демократиялық партиясы - 8 депутат.
«Сіздердің өкілеттіктеріңіз Орталық сайлау комиссиясында тіркелген сәттен бастап басталды. Енді сіздер – Қазақстан Республикасының заң шығарушы билігін жүзеге асыратын жоғары өкілді орган – Құрылтай депутаттарысыздар. Сайлау науқанының барлық кезеңдері заңнама талаптарына қатаң сәйкес ұйымдастырылды. Депутаттық мандат – халықтың сенімі мен таңдауының нәтижесі, ол сіздерге ел мен халық алдында үлкен жауапкершілік жүктейді», – деді Нұрлан Әбдіров.
Отырыс соңында Орталық сайлау комиссиясының Төрағасы Құрылтайдың жаңа депутаттарына куәліктері мен арнайы төсбелгілерін салтанатты түрде табыс етті.
