Гималай аймағында орын алған жойқын табиғи апат салдарынан қаза тапқандар мен із-түссіз жоғалғандар саны сағат сайын артып келеді. Непал полициясының жұма таңында хабарлауынша, Тибетпен шекарада батпақты тасқын жүргеннен кейін көз жұмғандар саны 469 адамға жетті. Тағы 800-ден астам адам дерексіз кеткен. Ал көршілес Тибетте (Қытай) кемінде 3 адам қаза тауып, 550-ден астам адаммен байланыс үзілген.
Жоғалғандардың басым бөлігі — шетелдік туристер. Құтқару жұмыстарына жаңа су тасқыны қаупі үлкен кедергі келтіріп отыр.
13 мыңнан астам құтқарушы жұмылдырылды
Апат аймағында жүрген Непал премьер-министрі Балендра Шах іздестіру-құтқару операцияларына 13 мыңнан астам қауіпсіздік күштерінің қызметкерлері — армия әскерилері, қарулы полиция мен ұлттық полиция өкілдері тартылғанын мәлімдеді.
Бейсенбіде апат аймағына 69 авиарейс ұйымдастырылып, 573 адам қауіпсіз жерге көшірілді. Зардап шеккендер үшін уақытша паналау пункттері ашылып, жарақат алған азаматтарға тегін медициналық көмек көрсетілуде. Қазіргі уақытта үкіметтің басты назары адамдарды құтқаруға және жоғалғандарды табуға бағытталған.
Жаңа апат қаупі жоғары
Непалдың Төтенше жағдайлар қызметі қайтадан су тасқыны жүруі мүмкін екенін ескертті. Бхотекоши өзенінде бөгет пайда болып, салдарынан су деңгейі қарқынды көтеріліп жатқан көл түзілген. Қытайдың мемлекеттік бұқаралық ақпарат құралдары Су ресурстары министрлігіне сілтеме жасап, көлдің 1 қыркүйекке қарай арнасынан тасуы мүмкін екенін хабарлады.
Мамандардың айтуынша, бұл жойқын тасқынға тау өзеніне құлаған алып мұз блогы себеп болуы ықтимал. Өзен жағалауындағы тұрғындар мен құтқарушыларға су бойынан алыс жүруге кеңес берілді.
Жоғалған шетелдіктердің тізімі
Непалдың Туризм кеңесі мен халықаралық агенттіктердің мәліметінше, із-түссіз кеткендердің арасында көптеген мемлекеттің азаматтары бар:
-
Индия: Ең көп жоғалғандар көрші Үндістан азаматтары — 177 адам.
-
АҚШ: Кемінде 63 азамат.
-
Украина: 53 турист.
-
Малайзия: 28-ден 55-ке дейін азамат.
-
Австралия: 34 адам.
-
Улыбритания: 33 азамат.
-
Канада: 25 адам.
-
Оңтүстік Корея: ГЭС-те жұмыс істеген 9 адам жоғалған, тағы 10 адам қиын жағдайда қалған.
-
Германия: Кемінде 8 адам.
-
Сингапур және ОАР: Әр елден 6 азаматтан.
-
Жапония, Жаңа Зеландия және Ресей: Әр елден 5 азаматтан.
Тибеттегі жағдай
Қытай БАҚ-тың хабарлауынша, Тибеттегі Гьиронг шекаралық өткелінің маңында (Қытай мен Непал арасындағы басты туристік транзит аймағы) 558 адам жоғалған, оның кемінде 260-ы — шетелдіктер.
Қытай Халық Республикасының Сыртқы істер министрлігі Непалмен тығыз байланыста екенін және зардап шеккен елдердің елшіліктеріне ақпарат беріліп жатқанын хабарлады. Ал жергілікті билік өкілдеріне апат салдарымен күресумен қатар, халыққа психологиялық қолдау көрсету тапсырылды.
